Кэбээйи улууһа төрүттэммитэ
85 сылын көрсө
Ахсынньы 18 күнэ - ураты күн. Мукучу нэһилиэгин модельнай библиотекатын алаһа дьиэтин иһинэн тэриллибит ИТ - Киин МУКУЧУ аһыллыыта буолла. Бу аныгылыы истииллээх киин Ил Дархан Айсен Сергеевич Николаев «Саха өрөспүүбүлүкэтигэр инновация уонна цифровой сайдыы» диэн укааһыгар олоҕуран тэрилиннэ. Саха өрөспүүбүлүкэтин инновация, цифровой сайдыы уонна инфокоммуникационнай технология Министиэристибэтэ күрэх ыыппыта. Бу тыҥааһыннаах күрэххэ улууспут аатыттан киин библиотека дириэктэрэ Ионова Анна Гаврильевна бэлэмнээбит бырайыага кыайан ИТ - Киин МУКУЧУ тэрилиннэ. Улуус администрациятын кытта «Мукучу нэһилиэгэ» муниципальнай тэриллии администрацията сметаны оҥордулар.
ИТ киин үлэтин сүрүн хайысхатынан научнай - техническай эйгэҕэ айымньылаахтык үлэлээһин, үөрэҕирии хааччыстыбатын тупсарыы, ИТ үөрэхтээһини уонна цифровой инфраструктураны сайыннарыы. Сүрүн соругунан буолар - балысхан сайдыы кэмигэр улууспут олохтоохторугар, гражданнарыгар киэҥ эйгэҕэ тахсалларыгар кыаҕы биэрии.
Техническай тэрили уонна офиснай миэбэли ылыыга өрөспүүбүлүкэ бюджетыттан биир мөлүйүөн 500 тыһыынча, онтон муниципальнай бюджеттан уонна бюджеты таһынан источниктан биир мөлүйүөнтэн тахса үп көрүлүннэ.
ИП Василий Алексеев Сангаартан кэлэн, таһаҕас, мал бөҕөтүн аҕалан икки хоһу муостатыттан саҕалаан бүтүннүүтүн олус тупсаҕайдык оҥордо. Сатабылларын, кыһамньыларын холбоон туппуттара куорат офиһыттан туох да итэҕэһэ суох буолла. Сылаас, сырдык.
Өрөмүөн бүппүтүн кэннэ сууйааһын -сотооһун, наардааһын, сааһылааһын түбүгэ төһө да сылаалааҕын иһин үөрүү аргыстаах ааста. Саҥа кэлбит миэбэллэри таҥааһыҥҥа олохтоох администрация уонна «Дайан» СК үлэһиттэрэ көмөлөстүлэр. Анна Гаврильевна куоракка оҥотторбут атрибутикаларынан лекториум, коворкинг хосторун киэргэттибит.
Күнтэн күн түргэнник элэҥнээн ааста. Ыраахтан - чугастан ыалдьыттар кэллилэр. Киирии тыл кэнниттэн аалай кыһыл лиэнтэни «Кэбээйи улууһа» муниципальнай оройуонун баһылыга Левин Иван Иванович, «Тимофей Егорович Сметанин аатынан Кэбээйи улууһун библиотеката» муниципальнай бюджетнай тэрилтэ директора Ионова Анна Гаврильевна, «Мукучу нэһилиэгэ» муниципальнай тэриллии баһылыга Сысоева Анна Ивановна үөрүүлээх быһыыга быстылар.
Библиотека үлэһиттэрэ алаадьынан, сахалыы баахыланан, саламаатынан, күндүлээтилэр.
Петр Кычкин - Сайылык Бүөтүрэ сахалыы үгэһинэн арчылаата, туойда. Дьон иһийэн туран иһиттэ.
Иннокентий Левин тылыгар, Алексей Калининскай - Луҥха Өлөксөйүн матыыбыгар, Кэбээйибит күөрэгэйэ Айталина Макарова толоруутугар «Кэбээйи» ырыаны дуоһуйа иһиттибит.
«Кэбээйи улууһа» муниципальнай оройуонун баһылыга Иван Иванович Левин, улуус культуратын салалтатын муниципальнай бюджетнай тэрилтэ салайааччыта Терехов Алексей Николаевич, «Мукучу нэһилиэгэ» МТ баһылыга Сысоева Анна Ивановна, биир дойдулаахпыт, «Смарт Строй» тэрилтэ салайааччыта Алексеев Виктор Семенович, «Т. Е. Сметанин аатынан Кэбээйи улууһун библиотеката» МБТ салайааччыта Ионова Анна Гаврильевна эҕэрдэ тыл эттилэр.
Галина Алексеева - Сайылык Кыыһын тылыгар, Роман Степанов матыыбыгар «Дойдум мүөттээх салгына» ырыаны Петр Кычкин толоруутун истэн олус сэргээтибит.
Мукучубут олохтооҕо Гуляева Екатерина Андреевна ИТ киин диэн суруктаах, ойуулаах оҥорбут тордунан ыалдьыттарбытын күндүлээтибит.
Ити курдук, биһиги улууспутугар, киэҥ Кэбээйибитигэр умнуллубат историческай түгэн - ИТ киин МУКУЧУ аһыллыыта буолан ааста. Өрөспүүбүлүкэбит Баһылыгар Айсен Сергеевичка, өрөспүүбүлүкэбит Бырабыыталыстыбатыгар, өрөспүүбүлүкэбит инновация, цифровой сайдыы уонна инфокоммуникационнай технология министрэ Семенов Анатолий Аскалоновичка, «Саха сирэ» Технопарк дириэктэригэр Габышев Петр Петровичка - улууспутугар ИТ эйгэ сайдыытыгар олук уурбут дьоммутугар махтанабыт. Бу бырайыагы бэлэмнээбит, көмүскээбит дьоммутугар барыларыгар махталбытын биллэрэбит. Саргылаах Сахабыт сиригэр муниципальнай оройуоннарга ИТ киин ситимэ сайдыытын өйүүр күрэх кыайыылаахтарыгар истиҥ эҕэрдэбитин тиэрдэбит.
Уопсай, бөлөҕүнэн уонна биирдиилээн хаартыскаҕа түһээһин түһүмэҕэ буолла. Бу кэскиллээх түгэн, хардыы улууспут сайдыытыгар төһүү күүс буолара саарбаҕа суох.
Им Ия Николаевна,
Мукучу модельнай библиотекатын
сэбиэдиссэйэ
20.12.2021 сыл
Comments