“Күн уотун сылааһын тутааччы” библиотечнай уруок
Бүгүн - ыам ыйын 25 күнүгэр - ССРС суруйааччыларын сойууһун чилиэнэ, Куокуйтан төрүттээх биир дойдулаахпыт Иванов Василий Иннокентьевич 80 сааһын томточчу туолар күнэ үүннэ. Библиотека алаһа дьиэтигэр гимназия 6 кылааһын үөрэнээччилэрэ учууталларын Васильева Е. Н. кытта литература эйгэтигэр, “Күн уотун сылааһын тутааччы” диэн библиотечнай уруокка сырыттылар. Мукучу уонна Куокуй модельнай библиотекалара (Спиридонова В.Н.) бэлэмнээбит информационнай слайдалартан оҕолор элбэҕи биллилэр.
Мукучу гимназиятын саха тылыгар уонна литературатыгар учуутала Корнилова Екатерина Ивановна суруйааччы Василий Иннокентьевич Иванов “Кырдьаҕастар уонна эдэрдэр” (1982) сэһэнин туһунан санааларым диэн Чолбон сурунаалга бэчээттэммит ыстатыйата обзордаммытын кэннэ ол тула сэһэргэһии буолла. Эдэр ааҕааччылар тус санааларын эттилэр, ордук гаастааһын тиэмэтэ интэриэһиргэттэ. Ытык кырдьаҕас суруйааччыга баҕа санааларын тиэртилэр.
Им Ия Николаевна,
библиотекарь, суруналыыс
25.05.2022 сыл
Комментарии