Мин, Филиппова Матрена Васильевна, «Талбаана» фольклорнай түмсүүнү салайан үлэлэтэ сылдьабын. Саҥа тэриллэрбитигэр салайааччы Алексеева Ритта Кимовна үлэлээбитэ. Саха норуотун ырыатын, хомуһун сэҥээрээччилэр түмсэммит эрчиллэбит.
Тыа сиригэр буоларын курдук: барыта араас идэлээх ыал ийэлэрэ, эбээлэрэ үлэбит кэнниттэн мустан ыллыыбыт, хомустуубут. Уопсайынан биһигини өбүгэлэрбит таҥастара - саптара, ырыалара - тойуктара, лыҥкынас ырыалаах хомустара угуйан, түмэн сылдьабыт. Ону сөргүтэн, саҥа тыыннаан дьоҥҥо - сэргэҕэ таһаарбыт киһи диэн айабыт - тутабыт.
Музыкальнай салайааччыбыт тыа сирин композитора Роман Константинович Степанов буолар. Музыкальнай оскуола преподавателлэрэ Борисова Анна Павловна, Самсонова Валентина Иннокентьевна күүс - көмө буолаллар.
Хомуска Алексеева Евдокия Михайловна, Андреева Прасковья Васильевна биһигини үөрэппиттэрэ. Саҥа түмсэрбитигэр биһиги хомус тардыытын сатаабат этибит. Сүрэх баҕатынан түмсүбүппүт. Билигин маастар кылаастарга үөрэнэбит, сайдабыт. Өссө да былаан элбэх, үөрэнэрбит да элбэх, онно бары бэлэммит.
Бөһүөлэккэ буолар тэрээһиннэргэ барытыгар көхтөөхтүк кыттабыт. Бүлүүгэ "Олоҥхо" ыһыаҕар кыттыбыппыт. «Дьиэрэй Бүлүүм хомуһа» республикатааҕы күрэххэ кыттан "2 степенннээх Лауреат" буолбуппут. Нвк-ҕа "Кэл олор, сэһэргэһиэх" диэн биэриигэ быһа эфиргэ кыттыыны ылбыппыт. Улууска Сангаарга "Мукучу күннэригэр" кыттыбыппыт. Клим Федоров күһүҥҥү лааҕырыгар "Ыллыыр Мырааҥҥа" сылдьан элбэххэ үөрэммиппит, кэрэ миэстэлэри көрбүппүт, пааркаҕа концертаабыппыт.
Бэлиэр тэриллибиппит 10 сыла буолла.
Филиппова Матрена Васильевна,
«Талбаана» фольклорнай түмсүү салайааччыта
11.04.2022 сыл
Хаартыскалар түмсүү фондатыттан ылылыннылар.
Ааҕааччыларбытын эҕэрдэлиибит,айымньылаах дьарыккытыгар ситиһиилэри баҕарабыт :)
.
Comments