Тохсунньу - Таҥха ыйа
Мукучубутугар тохсунньу 13 күнүгэр “Арчы” дьиэтигэр Дьөһөгөй сылыгар аналлаах “Таайтарыылаах Таҥха киэһэтэ” диэн тиэмэтическэй тэрээһин ыыттылынна. Кэлбит дьону сахалыы сиэринэн, сайыҥҥыны санатан буруолатан, дэйбииринэн ыраастаан, саҥа үүммүт сылга үчүгэй турук түстэннэ. Специалист Кондакова Валентина Ивановна бу түһүмэҕи салайан ыытта.
Айыы дьөһөгөй сылынан саханы саха дэппит, урааҥхай саханы кытта тэҥҥэ үйэлэргэ кэлсибит, түөрт түөрэм туйахтаах, нэлим хойуу сиэллээх, чороҕор доллу кулгаахтаах, санныгар дьабыллаах, субуруйар уһун кутуруктаах күн дьөһөгөй оҕото сылгы барахсан туһунан Евсеева Татьяна Гаврильевна, Григорьева Валентина Григорьевна сэһэн - кэпсэл ыыттылар.
Итии чэйдээх, сахалыы сүөгэйдээх сылаас алаадьылаах, быырпахтаах уо.д.а. дэлэй астаах остуол тардылынна, саха сиэринэн атах тэпсэн олорон ирэ - хоро сэһэргэһии буолла.
Тымныы оройо түһэн, куйаар арыллар кэмигэр, бэйэлэригэр күүс - көмө ылынаары, инникилэрин тымтыктанан, арыйан көрүүнү баҕалаахтар көрдүлэр - иһиттилэр.
Дьөһөгөй сылынан сахалыы оонньуулары оонньоттубут: түү мээчиги ыаҕайаҕа быраҕыы, ойбоҥҥо уулааһын, сүллүкүүн кутуругун таба үктээһин, ойбоҥҥо үктэтии уо. д. а. Оонньууларга хоппут биирдиилээн кыайыылаахтарга олохтоох администрация өйөбүлүнэн ылыллыбыт бириистэр бэрилиннилэр.
Ааспыт ахтылҕаннаах сыллар үҥкүүлэрэ тэрилиннэ.
Кэлбит дьон бары дуоһуйа астына сынньаннылар. Көмөлөспүт дьоҥҥо тэрийэр бөлөх (”Арчы” дьиэтин специалистара, моддельнай библиотека, ИТ киин кэллэктиибэ) махталын тиэрдэр.
Хаартыскалары манна көрүөххүтүн сөп https://drive.google.com/drive/folders/1gIQUy0-G1gvwiZOihwl4HhS0_5_bbki4?usp=sharing
Тохсунньу 13 күнэ, 2023 сыл
Матырыйаалы медиа киин бэлэмнээтэ.
Comments