Мукучу гимназиятын тэрийэр хамыыһыйата (иитэр завуч Кычкина А. Д.) бэрт интэриэһинэй тэрээһини ыытта. Киириитигэр модельнай библиотека сэбиэдиссэйэ республика күнүн ис хоһоонун ыччаттарга билиһиннэрдэ, Владимир Пестерев кинигэтин обзордаата, гимназия библиотекара Егорова Л. И. “Саха сирин бэлиэлэрэ: Мин патриоппын» республикатааҕы олимпиада нэһилиэккэ ыытыллыбыт тэрээһин хаамыытын сырдатта.
Уол оҕо суолтатын үрдэтэр сыаллаах “Уоланнар - 2023” түөрт түһүмэхтээх күрэҕи социальнай педагог Рожина Е. А. салайан ыытта. Биэс уол күөн көрүстэ. “Үлэ киһини киэргэтэр” түһүмэххэ К.Э. убаастыыр бэтэрээн учууталбыт Каратаев С.С. туһунан сырдатта. Л. Ю. эбээтин, кулууп методиһын, режиссеры Иванова С. В. үлэтин туһунан кэпсээтэ. И. Я. эбээтин, Герой Ийэни, 70-80 сылларга үрүҥ илгэни биир ынахтан 2000-3000 кирбиини ылбыт Иванова М. А. киэн тутта сэһэргээтэ. К. А. үлэни өрө туппут хос эһээтин Гуляев А. С. туһунан билиһиннэрдэ. В. С. төрдүн - ууһун билэр сыаллаах төрүччүтүн оҥорон аҕалбыт, күндү дьонун хос эбээтин Самсонова М. И. уонна хос эһээтин Самсонов П. Г. туһунан сырдатта. Бу түһүмэххэ үлэ дьонун уобарастара арылыннылар.
«Дойду салайааччылара» диэн слайдаларынан сирдэтэн историческай личностары таайдылар.
“Өркөн өй” тургутуутугар холоннулар, билиэттэри таланнар республикабытыгар уонна улууспутугар сыһыаннаах ыйытыыларга хоруйдаатылар.
“Айыы умсулҕана” диэн эйгэҕэ хоһооннору салҕаан айдылар.
Түмүк биллэриллиннэ: кылаан кыайыылаахтарынан Л.Ю. уонна В.С. буоллулар. “Хомоҕой хоһуйааччы” И.Я. уонна Л.Ю., “Өркөн өй” К.Э. анал ааттар ананнылар.
Ити курдук, ыччаттарбыт, эрэллэрбит, ааҕааччыларбыт араас дьоҕурдара арылыннылар.
Ситиһиилээх буолуҥ, мукучубут уоланнара!
Дьүүлүүр сүбэ састааба:
Саввинова Л. Л., история учуутала
Егорова Л.И., библиотекарь,
Им И.Н., сэбиэдиссэй
27.4.2023 сыл
Comments