Аан тыл
Күндү ааҕааччы!
Бу үлэни ааҕа олорон киһи оскуола эриэккэс эйгэтин иһигэр киирэр. Улууспутугар кырдьаҕас оскуолалар кэккэлэригэр киирэр Танара орто оскуолатыгар үөрэнэн бүтэрбиттэрэ үйэ аҥаара буолбут дьон тус санааларын суруйбуттар. Кинилэр хайдахтаах курдук дириҥ билиилээх, үтүө санаалаах, амарах майгылаах учууталларга үөрэммиттэрин, интернат иитээччилэригэр иитиллибиттэрин сөҕө ааҕыаҥ. Педагогтар бэйэлэрин тус холобурдарыгар, үөрэтэр ньымаларыгар, сиэрдээх майгыларыгар олоҕуран үлэлээбиттэрэ арыллар.
Үөрэх кыһата билиини биэрэрин таһынан ыччаттарын киһи быһыытынан иитэргэ туһаайбыт кэскиллээх үлэлэрэ сырдатыллар. Хас биирдии учуутал тус туспа предмеккэ уһуйбуттар, ол эрэн кинилэр таласпыт сыаллара биир - сиэрдээх киһини иитии. Ол иһин да буоллаҕа хас биирдии үөрэнээччилэрэ олох киэҥ дуолугар оннуларын булбуттар, сыалларын сиппиттэр, үлэһит бэрдэ буола үүммүттэр. Бу ахтыы кинигэ ытыктабыл бэлиэтинэн буолар.
Истиҥ үлэни сэҥээриэххит диэн эрэнэбин.
Им Ия Николаевна,
Мукучу нэһилиэгин модельнай библиотекатын сэбиэдиссэйэ,
Россия суруналыыстарын сойууһун чилиэнэ.
Түмүк тыл
Бииргэ үөрэммит табаарыспыт, тумус туттар киһибит Левин Алексей Иванович Мукучуга оскуолабыт үбүлүөйүгэр бииргэ түмсэн көрсүһүүбүтүгэр: "Оҕолор, биһигиттэн ураты ким суруйуой, үөрэппит учууталларбыт уонна кэккэбититтэн туораабыт кылааһынньыктарбыт тустарынан ахтыы кинигэтэ суруйуоҕуҥ эрэ", - диэн тыл көтөхпүтүн, мустубуттар бары сөбүлэһэн, оскуолабытын бүтэрбиппит 50 сылыгар 2021 сылга кинигэ таһаарарга кэпсэтии ыыппыппыт.
Хомойуох иһин, Алексейбытын дьылҕа - хаан тыйыс ыйааҕа эрдэ ылан бардар да, кини саҕалаабыт үтүө дьыалатын ситэрэр биһигиттэн тутулуктаах төлөрүйбэт эбээһинэспитин толорон, биир сыл хойутаан да буоллар, кинигэбит күн сирин көрдө.
Төһө да үйэ аҥаарыттан ордук кэм аастар, үөрэппит - ииппит, билиинэн кынаттаабыт, кэскилбитин кэрэһэлээбит, олохпутугар бөҕө тирэх буолар укулааты уурбут ийэ - аҕа тэҥэ истиҥ дьоммутугар, күндү учууталларбытыгар дириҥ махталбыт, тапталбыт уостубат бэлиэтинэн бу анал кинигэ буолар.
Алексеева Галина Алексеевна - Сайылык Кыыһа
Россия потребкооперациятын туйгуна, ветерана,
СР потребкооперациятын бочуоттаах үлэһитэ,
үлэ ветерана,
1 Лүүчүн нэһилиэгин бочуоттаах олохтооҕо
Бүлүү улууһа, Хампа сэл.
Ааҕааччы санаата
Галина Алексеевна дорообо!
Истиҥ тыллаах кинигэҕин туттун,биир тыынынан ааҕан бүтэрдим. Тылын-өһүн урана,сырдыга,ылыннарыылааҕа , боростуойа. Сүрэхпэр чугастык киирдэ... Аҕам барахсаны оҕолуу көнөтүнэн суруйбуккун астынным! Махтал истиҥэ баһаатайым чулуутугар!
Алексеева Ритта Кимовна
Comments