Сахалыы эйгэ тэнийэр
Саха тылын, суругун-бичигин нэдиэлэтигэр ананар
Саха тылын, суругун-бичигин нэдиэлэтигэр аналлаах ийэ тылы харыстыырга, иҥэринэргэ сирдиир тэрээһиннэр буоллулар. Үлэни быйылгы үбүлүөйдээх, бэлиэ даталарга туһаайдыбыт.
Саха бэйиэтэ Федор Григорьевич Винокуров - Даадар төрөөбүтэ 110 сылыгар Мукучу модельнай библиотекатын, И. Е. Левин аатын сүгэр Танара орто оскуолатын холбоһуктаах тэрийэр хамыыһыйата «Кэтит сир Кэбээйи...» диэн Мукучу нэһилиэгин олохтоохторугар хаартысканан дьүһүйүү кылгас болдьохтоох аахсыйатын олунньу 3-13 (13 түмүктэнэр) биллэрбитэ. Төрөппүттэр оҕолорун кытта кыттыыны ыллылар. Уопсайа 15 үлэ киирдэ.
«Кэтит сир Кэбээйи...», “Ааҕааччыларга”, “А. И. Софроновка”, “Суорун Омолооҥҥо”, “Эдэрдэргэ” диэн Даадар анабыл хоһооннорун дорҕоонноохтук ааҕыыны Мукучу гимназиятын нуучча тылыгар, литературатыгар учуутала Андросова А.А. уонна филиал сэбиэдиссэйэ салайан тэрийдилэр. Физкультура учуутала Ядрихинскай С.Ф., үрдүкү кылаас үөрэнээччилэрэ Волков Сергей, Егоров Альберт, Егоров Марк, Стрекаловскай Георгий, Филиппов Егор, Гаврильев Максим көхтөөх кыттыыны ыллылар.
Саха биллиилээх бэйиэтэ Анатолий Старостин-Сиэн Кынат көҥүл хоһоонноро киһи кутун-сүрүн долгуталлар, өйүн-санаатын түгэҕэр сонун толкуйу угаллар, олорор олохпутун анааран көрөргө туһулуур дириҥ ис хоһоонноохтор. Бэйиэт Сиэн Кынат “Уматар чуумпу” хомуурунньугар киирбит “Тыл” диэн ураты тыыннаах хоһоонун олохтоох администрация баһылыгы солбуйааччыта Сидоров В. В., специэлистэр Васильев В. Р., Иванов В. А., Дохунаев П. В. аахтылар. Автор быйыл 75 сааһын туолар.
“Тимофей Сметанин айымньыларыгар бэргэн этиилэр” уонна «Галина Кэптукэ кэрэ эйгэтэ» диэн информационнай видеолар оҥоһулуннулар.
Филиал фондатыттан улахан дьоҥҥо анаан «Тыл-норуот баайа» диэн тылдьыттарынан, оҕолорго аналлаах “Бичик”/ “Айар” кинигэлэрэ” диэн библиотекарь Новикова Д. И. кинигэ быыстапкаларын оҥордо. Кинигэ кыһата быйыл тэриллибитэ 95 сылын туолар.
“Кэнчээри” уһуйааҥҥа “Эдэр ааҕааччы - 2021 сыл” хоһоон ааҕыытын күрэҕэр кытталларыгар анаан иитээччилэргэ, төрөппүттэргэ матырыйаал булан биэрэн күүс-көмө буолабыт. Сүрүн болҕомто оскуолаҕа киириэн иннинээҕи оҕолорго туһаайыллар. Иитээччи Борисова М. И. библиотекаҕа чугаһа, сүбэлэһэн айымньылаахтык үлэлиирэ үөрдэр.
Ааҕар саалга өрөспүүбүлүкэтээҕи дьыктаан санитарнай ирдэбиллэри тутуһан тэрилиннэ. Бу сырыыга үгэс буолбут тэрээһинтэн уратынан тэйиччи остуоллары уурталааһын буолан 6 олорор миэстэ таҕыста. Киирии тылга сэбиэдиссэй үлэ ис хоһоонун, сыалын-соругун, хаамыытын билиһиннэрдэ. Амма Аччыгыйа «Атаҕастабыл» айымньытыттан тиэкис кэллэ, учуутал Самсонова С. Н. аахта. Уопсайа 6 ааҕааччы суруйда. Дьүүллүүр сүбэ бэрэссэдээтэлэ гимназияҕа саха тылыгар, литературатыгар учуутала Васильева Евдокия Николаевна, чилиэннэр СГУ саха филологиятыгар үөрэммит историяҕа учуутала Саввинова Елена Львовна, модельнай библиотека библиотекара Новикова Дария Игнатьевна түмүк таһаардылар. “Бастыҥтан бастыҥ суруксут” аат Михайлова Диана Ивановнаҕа - “Кэнчээри” уһуйаанын иитээччитигэр ананна. “Бастыҥ суруксут” ааты уһуйаан үлэһитэ Петрова Екатерина Александровна, МГ эдэр специэлиһэ Андросова Айыына Афанасьевна үллэһиннилэр. “Үчүгэй суруксуттарынан ” И. Е. Левин аатынан Танара орто оскуолатын эдэр специэлиһэ, оҥорон таһаарар үлэҕэ үөрэтии маастара Софронов Мичил Витемович, Оҕо кэрэ эйгэтин оскуолатын педагога Иванова Екатерина Ивановна, П. Н. Яковлев аатын сүгэр Мукучу учаастагын балыыһатын медицинскэй үлэһитэ Соломонова Светлана Иннокентьевна буолуллар. Тэрээһин истиҥ эйгэҕэ ааста, үөрэ-көтө уопсай хаартыскаҕа түстүбүт.
Араас тэрээһиннэргэ кыттыбыт, холбоон тэрийсибит социальнай партнердарбытыгар, ааҕааччыларбытыгар ис сүрэхтэн махтанабыт, өрүү маннык көхтөөх буолуҥ, хаһан баҕарар төрөөбүт тылбыт сайдарын туһугар тус кылааккытын киллэрэ, сахалыы эйгэни тэнитэ сылдьыҥ.
Им И.Н., Мукучу нэһилиэгин
модельнай библиотекатын
сэбиэдиссэйэ
Comments