Кэбээйи улууһугар уус-уран айымньы сылыгар ананар
Олунньу ый 13 күнүгэр – саха суругун-бичигин күнүгэр - Кэбээйи нэһилиэгэр «Олоҥхо эйгэтэ» диэн үс күннээх улуустааҕы семинар арыллыыта буолла. Мукучу делегацията кыттыыны ылла, олохтоох дьаһалта (баһылык Левин Н.И., баһылыгы солбуйааччы Егорова Е.Е.) тэрийэн, транспорынан хааччыйан ыыттылар.
Тэрээһин культура сайдыытын киинигэр регистрациялааһынтан саҕаланна, олохтоохтор алаадьынан күндүлээтилэр. Норуот маастара Е.К. Софронеева тыл эттэ, Тааттаттан кэлбит ыалдьыттары билиһиннэрдэ.
Библиотекарь Оконешникова С.В. “Кэбээйи олоҥхоһуттара” диэн С.Н. Тимофеев оҥорбут кинигэтин билиһиннэрдэ.
Былырыын тахсыбыт “Кэбээйи фольклора” диэн кинигэни Им И.Н. сырдатта уонна Мукучу делегацията олоҥхону үйэтитиигэ үлэтин туһунан билиһиннэрдэ, ыалдьыттарга электроннай дискэлэри бэлэхтээтэ.
“Дуйаҥ Өлөксөй сыдьаана Н.П. Софронеев” диэн иһитиннэриини Софронеева Е.К. оҥордо. “Олоҥхоһут Кырса Сөдүөт” туһунан Павлова З.А. бэрт интэриэһинэйдик кэпсээтэ. “Кэрэмэс сыдьаана” диэни Кычкина Т.И. билиһиннэрдэ. “Дьаргыл Дьаакып сыдьаана” диэн иһитиннэриини Архипова Е.Я. кэпсээтэ.
Ыалдьыттарбыт, “Олоҥхо суолунан айан” түмсүү салайааччыта Егасова А.М Тааттаҕа Олоҥхо сайдыытын историятыттан сэһэргээтэ. “Олоҥхо ыһыаҕа – 2023 сыл” олоҥхоһуттар күрэстэрин муҥутуур кыайыылааҕа Николаев А.Н. быһа тардан олоҥхолоон иһитиннэрдэ.
Сахалыы эйгэлээх “Сайдам” КСК быыстапка тэриллиннэ. “Бүдүрүйбэт сүһүөхтээх Мүлдьү” олоҥхону куукуланан оҥорон туруорбут “Кэскил” түөлбэ салайааччытыгар Соломонова С.В. диплом туттарылынна уонна “Якутия мастеровая” диэн республиканскай быыстапкаҕа туруоралларыгар этии киирдэ. Кыттыбыт уран тарбахтаах дьоммутугар Баишева И.А., Каратаева М.И., Софронова В.А. туоһу суруктары биэрдилэр.
Улуустааҕы киин библиотека кыраайы үөрэтэр библиотекэрэ, биир идэлээхпит Спиридонова А.Н. семинарга киирбит этиилэри түмэн резолюция оҥордо.
Ити курдук, “Олоҥхо ыһыаҕын” Кэбээйи улууһугар тэрийэргэ бэлэмнэнии үлэтэ барар.
Хаартыскалар, видео https://drive.google.com/drive/folders/1zTDgyZdBlZRAOUoSUTTimVeQet9XIUTG?usp=drive_link
ИМ И.Н.,
Мукучу модельнай библиотекатын сэбиэдиссэйэ,
Россия суруналыыстарын чилиэнэ
16.2.2024 сыл