Алтынньы 11 күнэ. Аҕа саастаах көлүөнэҕэ аналлаах декада биир сүрүн түһүмэҕинэн саха балаҕаныгар ыытыллыбыт “Олоҕум көмүс күһүнэ” диэн тиэмэтическэй тэрээһин буолла, элбэх дьон муһунна. «Мукучу нэһилиэгэ» МТ баһылыга Левин Николай Иванович киирии тылы эттэ, эҕэрдэлээтэ, махталын биллэрдэ, администрация аатыттан үбүлүөйдээх, кэрэ - бэлиэ түгэннэрдээх дьоннорго бэлэх туттарда.
“Дайан” СК кэллэктиибэ "Ааспыт кэм ахтылҕана" диэн урукку маллар, бэйэ оноhугун быыстапкатын, анал хаартыскаҕа түһэр муннугу тэрийдэ, культурнай - сынньанар түһүмэҕи Прокопьева Вера Николаевна бэрт интэриэһинэйдик ыытта. “Айхал” ансаамбыл кыра уонна улахан бөлөхтөрүн кыттааччылара (салайааччы Макарова А. Г.) көрөөччүлэр болҕомтолорун тарта.
“Сарыал” түөлбэ салайааччыта Саввинова Анна Афанасьевна бииргэ олорбуттара 50 сылын туолбут Мария Афанасьевна, Семен Семенович Гуляевтары эҕэрдэлээтэ.
Нэһилиэкпит ытык кырдьаҕаһа Кычкин Афанасий Афанасьевич төрөөбүтэ 90 сааһыгар анаан оҕолоро, олоҕун доҕоро Варвара Спиридоновна таһаарбыт “Олоҕум түгэннэрэ” диэн саҥа тахсыбыт кинигэтин кыыстара Егорова Лена Афанасьевна билиһиннэрдэ, ахтыы суруйбут дьоҥҥо бэлэх уунна, библиотека фондатыгар биэрдэ.
Мустубут саастаах дьон бары тыл эттилэр, санаа үллэһиннилэр, ырыанан, көрүнэн эрэ муҥурдамматылар, бу тэрээһин сүрүн уратытынан саҥа таллыбыт баһылыкка күүс - көмө буолар сыаллаах этиилэр киирдилэр, Ытык Сүбэ тэрилиннэ, баар проблемалары хайдах туоратар суол тобулунна. Ити курдук, «Кырдьаҕастан сүбэтин, эдэртэн эйэтин ыл» диэн өс хоһооно тоҕоостоох буолан таҕыста.
Саастаах дьон сүргэтэ көтөҕүллүбүт, тэрээһин бэрт сэргэхтик уонна күргүөмнээхтик ааста. Тэрийэр бөлөххө: олохтоох администрацияҕа, “Дайан” СК, оҕо дьоҕурун сайыннарар тэрилтэтигэр, ветеринарияҕа, олох - дьаһах коммунальнай хаһаайыстыбатыгар, библиотекаҕа, ИТ кииҥҥэ кырдьаҕастар махталларын биллэрдилэр. Уопсай хаартыскаҕа түстүлэр.
Нэһилиэкпит кэскилин туһугар элбэх идеялардаах тарҕастыбыт.
Хаартыскалары манна киирэн көрүөххүтүн сөп: https://drive.google.com/drive/folders/1JuNKe2qQfCxVDhHe2XlWcx9fN94hOCYY?usp=sharing
Тэрийэр бөлөх.
Хаартыскалар тэрийэр
бөлөх фондатыттан ылылыннылар.
12.10.2022 сыл
コメント