Бу күннэргэ үтүө сонуннары туттубут. Дьокуускайга Кэбээйибит улууһун көхтөөх ыччаттара “Дабаан” (ZEMA) диэн общественнай тэрилтэлээхтэр. Мукучубутуттан төрүттээх ыччаттарбыт инники күөҥҥэ сылдьалларыттан астынабыт. Ол курдук, ХИФУ юридическай коллеһын студена Васильев Спиридон Афанасьевич бэрэссэдээтэлинэн, кини хас да солбуйааччытыттан биирдэстэринэн ХИФУ ГРФ студена Ноговицын Александр Аркадьевич талыллан үлэлэрин саҕалаатылар.
Библиотекабыт көхтөөх ааҕааччытынан Спиридон Васильев буолар. 2017 сыллаахха Кэбээйи түмэлигэр буолбут төгүрүк остуолга илдьэ сылдьыбытым, Чурапчы көһөрүллүүтүн уустук тиэмэтигэр «Үйэлээх өйдөбүнньүк, доҕордоһуу сыһыан» диэн үлэтинэн кыттыыны ылбыта, түмүгэр тус хоһоонун ааҕан истээччилэрин долгуппута.
Маны таһынан айымньыны ырытыыга холонор. Ол үлэтэ биһиги фондабытыгар баар. Буойун суруйааччы Тимофей Сметанин төрөөбүтэ 100 сыллаах үбүлүөйүгэр тус кылаатын киллэрсибитэ, Үөһээ Бүлүү Кэнтигин делегацията кыттыылаах түһүлгэҕэ тэрээһини ыытыспыта. Спиридон ол саҕаттан дьоһуннаахтык толкуйдаан оҥорор ааҕааччыбыт буолар.
Биһиги - библиотекардар - олус эрэнэбит эн талыллыбыт общественнай үлэҕин кыайыаҥ диэммит. Ылсыбыт дьыалаҕын тиһэҕэр тиэрдэргэр, санааҕын сахалыы сайаҕастык сааһылаан этэргэр, олоххо бэлэмнээх буола улаатаргар төрөппүттэриҥ (иккиэн саха тылын, литературатын учууталлара) Евдокия Николаевна, Афанасий Спиридонович уонна үөрэммит кыһаҥ, төрүт сириҥ Мукучуҥ олук уурбуттара.
Мукучубут, Кэбээйибит улууһун ыччаттарыгар ситиһиилэри баҕарабыт.
“Дабаан” инниҥ диэки дабайан ис!
Им И.Н.,
Мукучу модельнай библиотекатын сэбиэдиссэйэ.
01.03.2022 сыл
Хаартыскалар “Дабаан” фондатыттан,
Васильевтар архыыптарыттан ылылыннылар
Comments