Алина Алексеева Мукучу гимназиятыгар үөрэммитэ, киниттэн маннык информацияны ыллым: “Аангылыйа тылын сөбүлээн, интэриэһиргээн үөрэтэбин. 2018 сыллаахха оҕо барыта PUBGmobile диэн мобильный-шутер диэни хачайдаан оонньууллар этэ. Иллэҥ кэммэр бириэмэ атаара таарыйа мин эмиэ хачайдааммын кыралаан оонньообутум, хобби курдук көрөөччүм суох. Ол кэннэ ыйтан ый аайы интэриэһиргээн киирэн саха дьонун кытта билсэммин оонньоон барбытым. Икки сыл ааспытын кэннэ Саха сиригэр тарҕанан хас биирдии оҕо, улахан киһи кытары оонньуур буолбута. Улахан дьоннор мустуу (клан) айаннар ол - бу бириистээх араас турнирдары ыытааччылар, бастаан саҕалыырбар инник курдук Саха комюнити эрэ иһинэн сылдьыбытым, онтон кыргыттар стактарыгар (хамаанда) киирбитим, ол кэнниттэн Саха сирин, СНГ турнирдарыттан саҕалаан улахан EU (атын омук) турнирдарыгар кыттан саҕалыы сылдьабыт. Маннык түмүктэри ситиһэммит HOTU диэн Саха киберспортивнай https://vk.com/hotuesports тэрилтэҕэ киирбиппит. Бу тэрилтэ дьоно биһиэхэ утары бараннар, көмөлөһөннөр, буткемп (оонньуур сир) биэрэннэр киберспорды дьоһуннаахтык ылынабыт. Билигин иллэҥ кэммэр оонньуубун диэхпин баҕарбаппын номнуо үлэ курдук буолан хаалла. Киэһээ 21:00 ч практическай оонньуулар (дьарыктар), 0:00ч кыра турнирдар, 3:00ч улахан турнирдарбыт саҕаланааччылар. Сороҕор түүн 3:00ч уһуктан кэлэммит эмиэ оонньооччубут. Бөдөҥ турнирдары атын омук сириттэн ыытар буоланнар биһиги бириэмэбит сөп түбэспэт буолан күчүмэҕэйдэри үөскэтэр.
Хамаандаҕа Сидорова Айыллаана «Dittomy» (Томпо), Борисова Наталия «Ponyo» (Дьокуускай), Алексеева Алина «Reise» (Дьокуускай), Фёдорова Антонина «Mai» (Бүлүү), Данилова Юлиана «Noriaki» (Дьокуускай), Быгынанова Айыына «Sociya» (Таатта) бааллар. Сидорова Айыллаана диэн хамандыырбыт, хас биирдии хардыыбытын көрөр, сыыһаларбытын быһаарар, позицияны, тактиканы барытын кини толкуйдуур, мин көмөлөһөөччүтэ буолабын. Бу оонньууга толкуйдуур наһаа наада, барытын тактика уонна уопут быһаарар, хайдах бүтэһигэр дылы “тыыннаах хааларгын” быһа холуйан 30 мүнүүтэ толкуйдуугун. Официальнай Лига Европы турыгар бириистээх миэстэҕэ тиксибиппит эбиппит. Өссө да улахан турнирдарга инвайт ол аата ыҥырыы биэрбиттэрэ”, - диэн биир дойдулаахпыт санаатын үллэстэр.
Эдэр ыччаппытыгар киирсиилээх, тыҥааһыннаах оонньууларга ситиһиилэри, үтүөнү, кэрэни баҕарабыт.
Им Ия Николаевна,
библиотекарь, суруналыыс.
Мукучу, 20.09.2022 сыл.
Хаартыскалары Алина Алексеева
Мукучу модельнай библиотекатын фондатыгар биэрдэ.
Comments