Инники суруллубутун курдук «100 фактов о Якутии в честь столетия” диэн национальнай библиотека тэрийбит медиа уруогу тэрийбиппит. Библиотека иһигэр 31 киһи кыттыыны ылла, онлайн 118 киһи көрдө. «80 фактов о Якутии» видеону көрдөрөн бараммыт маннык информацияны бэлэмнээтибит.
Мукучу туһунан 20 чахчылар
1. 1767 сыл - Орто Бүлүү симиэбийэтигэр икки тоҥус аҕатын ууһун сэргэ уон икки саха буолаһа баар эбит. Кинилэр истэригэр Мукучу буолаһа ахсыһынан киирэ сылдьар.
2. 1935 сыл - бастакы «Өкүчү” колхоз тэриллибит.
3. 1950 сыл - ахсынньыга Арҕаа Мукучутааҕы Сталин аатынан уонна Илин Мукучутааҕы Сталин аатынан колхозтар холбоһоннор биир бөдөҥсүйбүт Сталин аатынан колхоз буолбуттара. Саҥа бөдөҥсүйбүт колхоз киин уһаайбатын быһаарыыга үгүс мөккүөрдэр, мунньахтар ыытыллыбыттар. Бөдөҥсүйбүт колхоз киинин Сайылыкка олохтуурга быһаарыы ылыллыбыт.
4. 1952 сыл - Сайылык сэлиэнньэтэ төрүттэммит.
5. 1958 сыл - I Лүүчүн Молотов, II Лүүчүн Жданов, Мукучу Сталин ааттарынан колхозтар холбоһоннор бөдөҥсүйбүт биир Сталин аатынан колхоз буолбут.
6. 1959 сыл - Сталин аатынан колхоз “Правда” колхоз диэн уларытыллан ааттаммыта.
7. 1961 - 1962 үөрэх дьыла - Танара оскуолатын саҥа бөһүөлэккэ Сайылыкка көһөрүү ыытыллыбыт.
8. 1971 сыл - саҥа типовой култуура дьиэтэ тутуллубут.
9. 1973 сыл - 320 миэстэлээх саҥа типовой оскуола үлэҕэ киирбит. (1956 сыл - 25 миэстэлээх дьааһыла аһыллыбыт. 1968 сыл - «Кэнчээри» оҕо саада аһыллыбыт. 1984 сыл - оҕо музыкальнай оскуолатын филиала үлэтин саҕалаабыт. 1991 сыл - «Дьоҕур кыһата» диэн оҕо тэрилтэтэ аһыллыбыт).
10. 1976 сыл - «Кэбээйи» совхоз урукку Мукучутааҕы уонна Ньидьилитээҕи отделениеларын базатыгар саҥа “Мукучу” совхоз тэриллибит. (1992 сыл - «Мукучу» совхоз «Мукучу» агрофирмаҕа уларытыллан тэриллибит).
11. 1980 сыл - 15 куойкалаах саҥа типовой аҥардаах киэҥ - куоҥ балыыһа дьиэтэ тутуллубут.
12. 1981 сыл - сибээс отделениета саҥа дьиэлэммит.
13. 1988 сыл - Кэбээйи райпотун иһинэн Мукучутааҕы сельпо тэриллибит.
14. 1994 - 2003 сс. - Мукучу ыаллара гааһынан хааччыллыбыттар.
15. 1997 - 1998 үөрэх дьыла - Мукучутааҕы гимназия аһыллыбыт.
16. 2015 сыл - сотовай сибээс киирбит.
17. 2015 сыл – “Хапсаҕай түһүлгэтэ” тутуллубут.
18. 2018 сыл - «Арчы» дьиэтэ үлэҕэ киирбит.
19. 2019 сыл - 120 миэстэлээх ыанар ынахха аналлаах хотон үлэҕэ киирбит.
20. 2021 сыл - ИТ киин Мукучу тэриллибит.
Матырыйааллар 26.04.2022 сыл туругунааҕы
Мукучу нэһилиэгин модельнай библиотекатын фондатыттан ылылыннылар.
Comments