Саха АССР 100 сылыгар
Тоҥ муус хайыҥнаах кырыа хаар хаппахтаах, Күлүүһэ да суох хааллыбыт хаайыылаах Үс хос баттал ыкпыт Сахам сиригэр Көҥүл-дьол сарыала иилии эргийэр!
Эдэр ыччат Элиэнньин үөрэҕинэн Сирдэтэн, өрүкүйэн, өйө күүрэн, Саҥа олох иһин охсуһууга киирсэр, Саха автономиятын тэрийсэр!
Кыаммат, дьадаҥы быраабын үрдэтэн, Үлэни, үөрэҕи,сайдыыны көҕүлээн, Хотугу кыраайбыт улук уутуттан Уйгутун уһанса турбута уһуктан!
Саҥалыы дуорайта тойукпут, ырыабыт-- "Чох хара түүҥҥү" санньылхай матыыппыт! Бу улуу күүрээннээх биир үйэ устата Төрөөбүт туонабыт олоҕо тубуста!
Баттал тимир сыабын араарбыттарын, Өйдүөҕүҥ кинилэр ытык ааттарын-- Көҥүлбүт иһин туруммут Омуоһабы, Аржакову,Ойуунускайы,Бараахабы!
Дойдубут кэскилэ чэлгийэ үүнүөхтүн, Сайдыылаах сахабыт сэгэйэ үөрүөхтүн! Күннээх күөх урсун халлааныҥ күндээрэ Туругур, тапталлаах Сахабыт сирэ!
САБЫЙА.26.02.2022.
Хоһоону библиотекарь Варвара Николаевна булан биэрбитэ. Литературнай монтаһы Танара орто оскуолатын иитэр завуһа Мичил Витемович бэлэмнээбитэ. Видео оскуола фондатыттан ылылынна.
Видеону бу сигэнэн көрүөххүтүн сөп.
Comments