Ядреев, Егор Егорович.
Ааспыт санааларым, эппэтэх тылларым : хоһооннор / Егор Ядреев. - Дьокуускай : “Якутия” медиа холдинг, 2021. - 24 с.
Ааптар бастакы кинигэтигэр таптал сырдык иэйиитин, олох туһунан санааларын, төрөөбүт дойдутугар тапталын уустаан - ураннаан хоһуйар. Олох мөкү өрүттэрин көр - күлүү гынан саралыыр.
Ааҕааччы киэҥ араҥатыгар ананар.
Ситэ эппэтэҕин арыйбыт
Егор Ядреевы биһиги ылбаҕай тыллаах ырыа айааччы, мелодист быһыытынан билэбит, мантан ыла кинини хоһоон айааччы быһыытынан арыйабыт. Биһиги биир дойдулаахпыт Егор Егорович бастакы кинигэтэ күн сирин көрдө. Үөрүүтүн үллэстэн бэлэх гынан уунна. Ити курдук биһиги фондабыт кэҥээн иһэр.
Кинигэ тас өттүгэр уруһуйа ис өттүн эмиэ арыйар. Аргыый аҕай киһини толкуйдаан ааҕарга бэлэмниир. Автор элбэҕи толкуйдуур «Санааларым барахсаттар эһиги / Тохтоон, уоскуйа түһүҥ дуу,» - диир.
Доҕоругар Евгений Петрович Эверстовка анабыл хоһооно, Күндэкээҥҥэ сааскы булда, ииппит - такайбыт оскуолата, өр күүппүт күүстээх таптала, саха омугунан киэн туттуута, төрөөбүт дойдуттан тэйии аһыыта, кэлэйиитэ, тоҥуй сүрэх ууллара, алҕастара, иннин диэки дьулуһуута, күлүмнүү устар Танара эбэтэ хоһоонноругар холбоспуттар.
Олох түһүүлээх өрүттэрин “көр - күлүү” гынан көрдөрбүт.
Түһүүлээх - тахсыылаах олоҕор кини эрэлэ - сүрүн тирэҕэ буолар: “Билэбин олох араас охсууларын, / Ыарыы да ыалдьыттаан ааһыаҕын, / Олохпор эрэлим улахан / Дьоммор, доҕотторбор, оҕолорбор”.
Ити курдук, автор Егор Ядреев ситэ эппэтэҕин ааҕааччыларыгар арыйбыт.
Им Ия Николаевна,
Мукучу модельнай библиотекатын
сэбиэдиссэйэ, суруналыыс.
20.05.2022 сыл
Comments