Квест оонньуу салҕанар
Пионерия, Саха АССР тэриллибиттэрэ
100 сылларыгар ананар
Пионерия 100 сылын бэлиэтээһин историяҕа дириҥ суолу - ииһи хаалларбыт В. И. Ленин пааматынньыгар Сэбиэскэй пааркаҕа сибэкки дьөрбөтүн ууруттан саҕаланна. Салгыы бу састаап (олохтоох администрация, “Дайан” СК киинэ, модельнай библиотека, ИТ киин) историяны ахтан - санаан ааһар түһүлгэҕэ “Арчы” дьиэтигэр муһунна.
Интеллектуальнай күрэҕи модельнай библиотека, ИТ киин тэрийдилэр. Киирии тылга бочуоттаах ыалдьыбыппытыгар, 1968 сылтан 1972 сылга диэри пионерскай тэрилтэҕэ баһаатайдаабыт, оҕо - аймах истиҥник саныыр ааҕааччыбытыгар Яковлева Маргарита Ивановнаҕа “Т. СМЕТАНИН” (стихи, рассказы, посвети, сказка и пьесы для детей) диэн суруйааччы айымньыларын нууччалыы тылбааһын кинигэтин бэлэх ууннубут. Тимофей Егорович Сииттэҕэ пионер баһаатайдаабыта, ол туһунан сайпытыгар сырдатыллыбыта.
Дьүүллүүр сүбэ маннык састааптаах үлэлээтэ: бэрэссэдээтэл Яковлева М.И. - бочуоттаах ыалдьыт, Сысоева А.И. - “Мукучу нэһилиэгэ” МТ баһылыга, Им И.Н. - модельнай библиотека сэбиэдиссэйэ.
Хамаандалар эрдэ дьиэтээҕи сорудахтары ыланнар ааттарын, девизтэрин, речевкаларын, биир тэҥ формаларын бэлэмнэнэн кэлбиттэр. “Дайан” СК “Спартак”, администрация “Орленок” ааттары талбыттар.
Модератор Афанасьева В. Н. араас түһүмэхтэри ыытта. Ол курдук уустук түһүмэҕи викториналары таайан бараннар салгыы ребустары тиийдилэр, бу саамай тыҥааһыннаах түһүмэх буолбутун бэлии көрдүбүт. Криптограмма ньыматынан пионер сокуоннарын төһө билэллэрин көрдөрдүлэр, лозуннары умнубатахтарын бигэргэттилэр. Сэбиэскэй киинэлэри олус сөбүлээн көрөллөр эбит. Саха сирин биллиилээх дьоннорун слайдаларынан сирдэтэн таба таайан истилэр, тыллары таһаараннар түһүмэҕи түмүктээтилэр.
Дьүүллүүр сүбэ түмүк таһаарар кэмигэр ырыа таайдылар, музыка истэн уоскуйдулар. Маргарита Ивановна “Саха АССР историятын билээччилэр” диэн анал ааты “Спартак” хамаандаҕа, онтон Анна Ивановна “Пионерия историятын билээччилэр” диэн анал ааты “Орленок” хамаандаҕа туттардылар. Тэрийбит тэрилтэ хамаандаларга торт бэлэх уунан үөрүүлэрин үксэттэ.
"Дайан" СК тэрийбит ретро быыстапкатын сэҥээрэ көрдүлэр.
Ити курдук эмиэ да тыҥааһыннаах ол эрээри эйэлээх сыһыаннаах тэрээһиммит түмүктэннэ.
Квест оонньуу сыл устата тэрилтэлэр икки ардыларыгар салҕанан баран иһиэҕэ.
Хаартыскалары, видеолары бу сигэлэринэн киирэн көрүөххүтүн сөп.
Им Ия Николаевна,
библиотекарь, суруналыыс.
Хаартыскалар, видеолар администрация,
библиотека фондаларыттан ылылыннылар.
19.04.2022 сыл
コメント