Саха АССР тэриллибитэ 100 сылыгар ананар
Улууска эрэ буолбакка республикаҕа айымньылаах үлэтинэн биллэр “Кэнчээри” оҕо уһуйаанын коллективыгар (салайааччы Егорова Е. Е.) библиотекардар уонна ИТ киин квест оонньуу тэрийдибит. Биһиги ыкса ситимнээхтик үлэлиир иитээччибит Борисова М. И.: “Интеллектуальнай оонньуу тэрийиэххит дуо?” - диэн этии киллэрбитин үөрүүнэн сөбүлэспиппит. Тэрээһин саҕаланыан нэдиэлэ иннинэ “История Якутии”, А. А. Калашников аатырбыт “Якутия. Хроника. Факты. События” кинигэлэрин билиһиннэрбиппит.
Модератор Афанасьева В. Н. икки хамаанданы тэрийдэ. “Дьулуур” хамаанда хамандыырынан Татьяна Афанасьевна Гоголеваны, “Кэскил” хамаандаҕа Диана Ивановна Михайлованы таллылар, девиз толкуйдаатылар.
Оонньуу уустук түһүмэхтэн саҕаланна. Хамандыырдар күрэхтэһиилэригэр дириҥ историялаах Сахабыт сирин туһунан викторинаттан саҕаланна. Тыҥааһыннаах киирсии буолла. Ол кэнниттэн бүтүн хамаанданан кытаннар сэбиэскэй сойуус лозуннарын ситэрдилэр, умнулла быһыытыйбыт аббревиатуралары сааһылаатылар, информационнай слайдаларынан саха биллиилээх деятеллэрин таайдылар, тылы уонна ырыаны таайыыга күрэхтэстилэр.
Дьүүллүүр сүбэ эппиэтинэстээх үлэтин кэнниттэн «Кыайыыга дьулуурдаах” “Дьулуур” хамаандаҕа, “Инникигэ кэскиллээх” “Кэскил” хамаандаҕа анал номинациялар аната. Оҕо кыһата кыттыбыт дьоҥҥо, социальнай партнердарыгар приз туттардылар, онтон библиотека хамаанда аайы кинигэ бэлэх уунна. Ити курдук эмиэ тыҥааһыннаах ол эрээри эйэлээх сыһыаннаах тэрээһиммит түмүктэннэ.
Аныгыскы көрсүөххэ диэри!
Им Ия Николаевна,
библиотекарь, суруналыыс.
Ноговицына А.И. хаартыскаларга түһэрдэ,
видеоҕа уһулла.
28.04.2022 сыл
Comments