Бу хаартыска мин түһэриим. Училищеҕа үөрэнэ сырыттахпытына бастакы нүөмэрдээх уопсайбыт иитээччитэ Аксинья Гаврильевна Игнатьева биллиилээх дьону кытта көрсүһүү киэһэлэрин тэрийэрэ. Биир оннук ыалдьытынан Виталий Андросов буолбута. Маннык ыалдьыттарынан суруйааччы Иван Гоголев, үҥкүүһүт Наталья Христофорова, композитор Захар Степанов кэлэ сылдьыбыттарын өйдүүбүн.Виталий Андросов биир дойдулааҕа, доҕорум Гоша Сотниковтыын түспүттэрэ. Бу хаартысканы 1976 сыл кыһыныгар түһэрбиппин. Ол аата түөрт уон биэс сыл ааспыт. Виталий Андросов оччоҕо сүүрбэ биэстээх эдэр киһи эбит. Төһө да эдэрин иһин ыччат дьоҥҥо биллэр киһи этэ. Онон ыалдьыттата ыҥырылыннаҕа. Кини чөл олоҕу тутуһара. Биһиги уопсайбыт аттынан эрдэ сүүрэн ааһарын уолаттар кэпсииллэрэ.
Кэлин кинини 1987 сыл республиканскай балыыһаҕа үөрэнэ сылдьан көрбүтүм. Оччолорго киэҥ араҥаҕа биллэр киһи этэ. Ол да буоллар сүрдээх сэмэй киһи буолара тута биллэрэ. Ыарыһахтарын эрэнгиэҥҥэ түһэттэрээри кэпсэтэриттэн көстөрө. Дьэ, оннук саха биир чаҕылхай киһитинээн алтыһан ылбыт түгэннэрим
Алаас Уола 07.08.21. Хаандыга б.
Comments