Аҕа саастаах дьон декадаларын чэрчитинэн библиотека дьыалатыгар тус кылааттарын киллэрбит биир идэлээх ветераннарбытын чиэстээтибит.
Уруккуну, хойуккуну ирэ - хоро кэпсэттибит. Мария Афанасьевна тус опытыттан атастаста, күннээҕи олох түбүгүн быыһыгар сөбүлүүр дьарыгын - үүнээйини үүннэрии туһунан астынан, ис иһиттэн үөрэн туран сэһэргээтэ, санберри сиэмэтин, барыанньатын бэлэхтээтэ. Олохтоох дьаһалта баһылыга Николай Иванович «Оҕуруот аһа» диэн түмсүү, опыт атастаһан төгүрүк остуол тэриллэригэр баҕа санаатын эттэ.
Ветераннарбытыгар бэлэхпитин туттардыбыт. Антонина Алексеевна сатаан кэлбэтэҕин учуоттааммыт дьиэтигэр сылдьан эҕэрдэлээтибит.
Түмүккэ ветераммыт Мария Афанасьевна баҕа санаатын эттэ: «ИТ киин аһыллыбыта үчүгэй, ол эрээри библиотекаҕа киэҥ - куоҥ ааҕар саала хайаан да баар буолуохтаах», - диэтэ.
Ити курдук, ааспыты ахтан, кэскиллээҕи кэпсэтэн тарҕастыбыт.
Им Ия Николаевна,
Мукучу модельнай библиотекатын сэбиэдиссэйэ.
Хаартыскаларга филиал фондатыттан ылылыннылар.
15.10.2022 сыл
Comments