Улуу өктөөбүрүскэй социалистическай революция
төрүттэммитэ 105 сылыгар ананар
“Мукучубут бастакы коммуниһа” диэн тиэмэтическэй дөкүмүөннэринэн быыстапканы сөргүтүллэн эрэр музей (түмэл) үлэһитэ Павлова Елизавета Степановнаны кытта кыттыһаммыт оҥордубут.
Биһиги ытыктыыр биир идэлээхпит Яковлев Николай Егорович ылыммыт уонна оҥорбут дьыалатыгар бэриниилээх, тулхадыйбат санаалаах коммунист этэ. Бу күн араас араҥа ааҕааччыларбыт сылдьаннар быыстапканы биирдиилээн көрдүлэр, сэҥээрдилэр. Урукку кэми санааннар, бастакы коммунист уобараһын тула Евдокия Ивановна, Анастасия Петровна, Анна Дорофеевна ирэ - хоро сэһэргэстилэр. Кинилэр талбыт идеяларыгар бэрт бэриниилээх ааҕааччылар буолаллар.
«Дьон холобур оҥосторугар Николай Егорович олоҕо бары өттүнэн эппиэттиир. 1 группалаах инвалид эрээри соҕотоҕун кыра 5 оҕолорун кытта хаалан баран бука барыларын атахтарыгар туруорбута, икки оҕото республикабыт киэн туттар үтүөлээх быраастара буолбуттара. Уола Яковлев Прокопий Николаевич доруобуйа харыстабылын министэригэр дылы үүммүтэ.
Мукучулар бастакы коммуниспытынан киэн туттабыт, кини аатын олохтоох библиотекабытыгар иҥэриэххэ дэстибит», - диэн Анна Дорофеевна санаатын үллэстэр.
Түмүккэ нэһилиэкпит библиотекатыгар Яковлев Николай Егорович аатын иҥэрэр идеяны олоххо киллэрэргэ ааҕааччыларбыт, “Ытык сүбэ” түмсүү чилиэннэрэ күүс - көмө буолалларыгар сүбэлэстибит.
Ия Николаевна Им,
сэбиэдиссэй
07.11.2022 сыл
Хаартыскаҕа Саввинов А.П., Каратаева М.Ю. түһэрдилэр
Bình luận