Ахсынньы ый Мукучубутугар уратытык саҕаланна, ол курдук нэһилиэкпит төрүт олохтооҕо, дьону - сэргэни билэр, айар дьоҕурдаах Валентина Ивановна Кондакова - Айтыына “Арчы” дьиэтигэр үлэлии киирдэ. Сарсыардаттан күөх төлөн уотун оһоҕор алаадьы буһаран, сыт таһааран, аал уокка айах тутан дьиэни маанылаата, кэлбит дьону арчылаата.
Киэһэ 5 чааска нэһилиэкпит аҕа баһылыга Николай Иванович киирии тылы эттэ: “Бу ураты эйгэҕэ биһиги эдьиийбит Валентина Ивановна тылбын ылынан, сөбүлэһэн киирбитигэр махтанабын. “Арчы” дьиэтэ саҥа тыыннанан үлэтин саҕалаан, суолтатын арыйан, тус аналын толоруо диэн эрэнэбин”.
Валентина Ивановна Билгэ хаан ыйын суолтатын быһаарда, ыйдааҕы сиэр - туом суолтатынан араас тиэмэтическэй тэрээһиннэр ыытыллыахтарын билиһиннэрдэ.
Мустубут дьон ип итии чэй, сып сылаас алаадьы, кыынньар кымыс, саламаат амсайаннар, атах тэпсэн олороннор сэһэргэстилэр, санаа үллэһиннилэр, үөрэ - көтө тарҕастылар.
Сайыҥҥы түптэ сытын санатан, буруо сытынан дыргыйан, дьиэ иһэ биллэ сэргэхсийэн, сахалыы санаалаах дьоммут мустар, тоҕуоруһар сирэ буолан ыҥыра, угуйа туруохтун.
Ия Николаевна ИМ,
библиотекарь, суруналыыс.
1.12.2022 сыл
Comments