Мукучу олохтооҕо, "Кэнчээри" уһуйаанын тьютора Софронеева Роза Андреевна мультик оҥорорун туһунан сырдатабыт.
Айымньылаах дьарык
(интервью)
- Хаһааҥҥыттан мультик оҥоруу эйгэтигэр сыстыбыккыный?
- 2020 сыллаахха пандемия кэмигэр, дьиэҕэ олороммун МК ылбытым, ол кэннэ пластилинынан мультиктары оҥорон саҕалаабытым, бастаан саҥата суох мультиктары оҥорон көрбүтүм.
- Саҥалаах мультик оҥорорго хаһааҥҥыттан холоммуккунуй?
- Оҕо таптыыр суруйааччыта, биир дойдулаахпыт Т. Е. Сметанин "Куоскалар уонна саһыл" үгэ хоһоонугар былырыын кыыспын Сайнаараны кытта саҥалаах гына таҥан таһаарбыппыт. "Космос" диэн кыра мультикпын бэлэмнэнэр бөлөх оҕолорун кытта таҥан, оҥорон таһаарбыппыт.
- Ордук ханнык кэмҥэ оҥороҕунуй?
- Пластилин хас да көрүҥүн атыылаһабын, бириэмэлэнним да мультик геройдарын оҥорон көрөбүн.
- Бу дьарыккар, көрдөхпүнэ, имигэс буолуу ирдэнэр эбит дии.
- Улахан уолбут Айтал оҕо сылдьан кып - кыра саллаат бөҕөтүн оҥорор этэ, ону көрөн санааччыбын: “Айуу, хайдах маннык кыра дьону оҥоруохха сөбүй?” -диэммин. Бэйэм оскуолаҕа эрэ пластилинныы сылдьыбытым. Илии имигэһэ ирдэнэр эбит: кыра деталлары оҥорорго араас пинцеттэри, спичка маһын туһанабын. Сорох геройдар миниатюрнай илиилээх, атахтаах буоланнар хамсатарга да киһи куттанар. Пластилинныыр оҕо илиитэ олус имигэс буолар, тарбахтарын быччыҥнара сайдар.
- Сатаммыт үлэлэргин ааттаталыаҥ дуу?
- “Эриэппэ”, “Космос”, “Куоскалар уонна Саһыл”, “Куттас куобахчаан”.
- Баҕа санааҥ.
- Уһуйаан оҕолорун саҥардан мультик таҥмыт киһи диэн баҕа санаалаахпын.
- Интэриэһинэй дьарыгыҥ туһунан санааҕын үллэстибиккэр махтанабыт. Айымньылаах дьарыккар ситиһиилэри баҕарабын.
Интервьюну ылла, Им И.Н.,
Мукучу модельнай библиотекатын сэбиэдиссэйэ, суруналыыс
25.10.2023 сыл
Мультиктары сиһилии бу куйаар кодтарынан көрүөххүтүн сөп.
コメント