Лүүчүн нэһилиэгэ тэриллибитэ 110 сылыгар аналлаах саһарбыт хаартыскалар альбомун тутан олороҕут. Бу ытык Лүүчүн дьонун-сэргэтин умнуллубат кэрэ мөссүөннэрин, олоҕун-дьаһаҕын кэпсиир, көрдөрөр хаартыска альбома таҕыста.
Күн-дьыл аастаҕын аайы үгүс түгэн умнуллар-симэлийэр. Ол ону сөргүтэн «кэнэҕэски кэнчээри ыччат дьоммут уруккуну умнубатын, өбүгэлэрин өйдөөтүн, төрүттэрин-уустарын биллин» диэн ыраах-чугас олорор биир дойдулаахтарбытыгар анаан 1 Лүүчүҥҥэ төрөөн-үөскээн, үлэлээн-хамсаан ааспыт дьоннорбут тустарынан үтүө өйдөбүнньүк буолан хааларыгар, бу саһарбыт хаартыскаларынан альбом оҥорон таһаарбыттара кэрэхсэбиллээх.
Автор, биһиги биир идэлээхпит, Баҕадьа нэһилиэгин библиотекатын библиотекара, Саха республикатын култууратын туйгуна Андреева Дария Алексеевна салайан ыытта.
Аҕа саастаах көлүөнэ бэрэстэбиитэлэ, нэһилиэк кырдьаҕастарын сэбиэтин председателэ Васильев Трофим Дорофеевич тыл эттэ.
Баҕадьа сүрүн сүһүөх оскуолатын директора Алексеева Мария Алексеевна санаатын иһиттибит.
Эдэр көлүөнэ бэрэстэбиитэлэ, олохтоох нэһилиэк депутата, алын сүһүөх кылааһын учуутала Саввинов Айаал Иванович тус санаатын эттэ.
Кинигэ тахсыытыгар сүрүн тирэх буолбут киһибит, «1 Лүүчүн нэһилиэгэ» муниципальнай тэриллии баһылыга Левин Николай Ивановичка үлэ хаамыытын, сыалын - соругун билиһиннэрдэ.
Ити курдук, бэрт сэргэх түһүмэх буолла.
Комментарии