Олунньу 12 күнүгэр төрөөбүт тыл уонна сурук - бичик күнүгэр аналлаах “Cахалыы дьыктаан - 2022” диэн республикатааҕы акцияҕа нэһилиэкпит араас көлүөнэ ааҕааччылара кыттыыны ыллылар. Икки сиринэн тэрилиннэ: И. Е. Левин аатынан Танара орто оскуолатыгар уонна модельнай библиотека иһинэн тэриллибит ИТ киин Мукучу киинигэр икки түһүлгэ. Оскуолаҕа 10 улахан дьон, 4 үөрэнээччи, библиотекаҕа 8 улахан дьон тургутууну аастылар.
Танара оскуолатын саха тылыгар, литературатыгар учууталлара Самсонова Светлана Николаевна уонна Васильев Афанасий Спиридонович тиэкси аахтылар. Тиэкис судургута суох, ол курдук Семен Данилов «Барымаҥ даа, кубалар» айымньытыттан суруйдулар.
ИТ киин саҥа, эдэр специалистара Ноговицына Анна Ивановна, Саввинов Анатолий Петрович бу үлэҕэ сыстаннар техническай өттүгэр үлэлээтилэр.
Биһиги социальнай партнердарбытын: үөрэх кыһатын научнай - чинчийэр үлэҕэ директоры солбуйааччы Аммосова Татьяна Климовнаны, иитэр завуч Софронов Мичил Витемовиһы кытта ситимнээхтик үлэлээтибит. Эпидемиологическай ирдэбиллэр толору тутуһулуннулар.
Тэрийбит тэрилтэлэргэ-национальнай уонна улуустааҕы киин библиотекаҕа,
нэһилиэк тэрилтэлэрин салайааччыларыгар Сысоева А. И., Егорова Е. Е., Кудрина К. Б. кыттар дьоннору көҕүлээбиттэригэр, тэрийбиттэрин иһин махталбытын тиэрдэбит.
Библиотекарь Афанасьева Варвара Николаевна “Төрөөбүт төрүт тылбыт” диэн кинигэ быыстапкатын бэлэмнээтэ. Хас да түһүмэхтээх: «Тылдьыттар», «Саха классиктарын айымньылара» уонна Россияҕа норуот айымньытын сылыгар туһуламмыт «Норуот айымньытын тыла - өһө».
Тустаах дьон бары тус кылааттарын киллэрэннэр тэрээһиннэр бэрт сэргэхтик аастылар.
Им И.Н., Мукучу модельнай библиотекатын сэбиэдиссэйэ.
Ноговицына А. И. хаартыскаҕа түһэрдэ.
12.02.2022 сыл
Comments